حاجی چوہدری مشتاق آسؔی اشاعت"سہہ ماہی مجلہ "چومصرع" جولائی ،اگست،ستمبر

حاجی چوہدری مشتاق آسؔی، رجور سہنسہ، آزاد کشمیر

خالی نہ کدی پرتائے مالک، کردا فضل نال مینوں عطا دُوگنا

لج میں غریب دی رکھ لیندا، اپنے در تھیں دے کہ گدا دُوگنا

دین والا دا نہیں احسان مُکدا، بے شک کراں میں شُکر ادا دُوگنا

اُوہ ہے سخی تے داتا مشتاقؔ آسی، مالا مال جو کردا خُدا دُوگنا

صد شُکر تے صد احسان اُسدا، کرم نال جو دیندا کریم دُوگنا

بدلے وچ کر چوگنا عطا دیندا، اُسدے ناں جے کرو تقسیم دُوگنا

اک جگ نہیں بلکے دو جگ اندر، دیندا بندے نوں اجر عظیم دُوگنا

رب مرضی دا مالک مشتاؔق آسی، جس نوں چاہندا دیندا رحیم دُوگنا

سعادت دو نواں نوں ہوئی نصیب آخر، آگئے آقا سنسار وچ فجری فجری

رفو چکر خزاں ہوگئی اُس دم، کھلے گُل و گُلزار وچ فجری فجری

عرشی عرش تے فرشی فرش اُتے، ہو گئے محو دیدار وچ فجری فجری

عرشوں دیون سلامی مشتاقؔ آسی، آئیاں حوراں قطار وچ فجری فجری

تیری آمد دی دیون نوید سجری، پنچھی گُل و گُلزار وچ فجری فجری

کھلیاں کلیاں اک عجب نکھار لے کہ، چہکی بُلبل بہار وچ فجری فجری

قسمت اہل جہان دی جاگ اُٹھی، مچ گئی دھوم سنسار وچ فجری فجری

آئیاں دیون سلامی مشتاقؔ آسی، حُوراں عرب دیار وچ فجری فجری

یاداں دے بحر نہ مار غوطے، میرے گزرے ایام دا ذکر نہ کر

نکل گئی جو دل و دماغ وچوں، اُس حسرت ناکام دا ذکر نہ کر

پہنچ سکیا نہ جو تشنہ لباں تیکر، ساقی چھوڑ ہُن جام دا ذکر نہ کر

اپنی موت جو مویامشتاقؔ آسی، اُس آسی گمنام دا ذکر نہ کر

راکھ ہوگئے خرمن محبتاں دے، سر لب چراغ دا ذکر نہ کر

کلیاں رُخ شباب دا ویکھیا نہیں، میرے اُجڑے باغ دا ذکر نہ کر

ساقی دور صحراحی تھیں جا بیٹھا، میرے خشک ایاغ دا ذکر نہ کر

جل جاندا وجود مشتاقؔ آسی، میرے دلدے داغ دا ذکر نہ کر

شئیر کریں: