اداریہ "چو مصرع مجلہ" جولائی،اگست۔ستمبر

اداریہ                 

 اللہ ربّ العزت کے فضل و احسان سے سہ ماہی ” چو مصرع “ کی اشاعت اپنی تمام تر ادبی نزاکتوں، تہذیبی حوالوں اور جمالیاتی حسن کے ساتھ آپ کی خدمت میں پیش کی جا رہی ہے۔ یہ صرف ایک مجلہ نہیں، بلکہ ایک ادبی تحریک کی ابتدائی صدا ہے—ایک ایسا خواب جو مدتوں سے اہلِ سخن کی نگاہوں میں تھا اور جسے تعبیر کی منزل تک لانے میں ہم نے شب و روز کا سفر طے کیا۔

خطۂ پوٹھوہار و آزاد کشمیر کی زبان و ادب کا دامن مختلف اصنافِ سخن سے مرصّع ہے، مگر ”چو مصرع“ کی صنف اس خطے کی تہذیبی شناخت اور شعری روایت کا ایک انمول گوہر ہے۔ اس صنف میں وہ دل آویز رچاؤ، سادگی میں پنہاں گہرائی، اور فطرت سے جُڑا وہ رنگ ہے جو براہِ راست دل پر اثر انداز ہوتا ہے۔ یوں تو اس فن میں بے شمار صاحبِ طرز شعراء نے اپنی تخلیقی کاوشوں سے رنگ بھرا، مگر ان کے کلام کو محفوظ اور مربوط کرنا وقت کی ایک اہم ضرورت بن چکا تھا۔

                            ان شعراء کے ساتھ ساتھ، پوٹھوہار کے شعرخوان حضرات نے بھی فنِ گائیکی، ساز و سر، اور مخصوص علاقائی آہنگ کے دلنشین امتزاج سے ایک ایسی روحانی فضا پیدا کی، جس نے ”چو مصرع“ کو صرف پڑھنے کا نہیں، بلکہ سننے، محسوس کرنے اور روح میں اُتر جانے کا بھی فن بنا دیا۔ اُن کی مخلصانہ کاوشیں اس روایت کو ایک زندہ، متحرک اور ہمہ گیر فن کی صورت عطا کرتی ہیں، جو نہ صرف دلوں کو چھوتی ہیں بلکہ جذبات کی سچی ترجمان بھی ہیں۔

طوبیٰ فاؤنڈیشن کا عزم ہے کہ اس ادبی اور ثقافتی ورثے کو نہ صرف محفوظ کیا جائے بلکہ جدید تحقیق، تدوین اور اشاعت کے ذریعے اسے نئی نسل تک بھی منتقل کیا جائے۔ ہماری کوشش ہے کہ ”چو مصرع“ کو سہ ماہی سے ترقی دے کر ماہنامہ بنایا جائے، اور اس میں محض کلام ہی نہیں بلکہ شعراء کا تعارف، ان کے فنی اسلوب پر مباحث، تحقیقی مقالات اور شعری جمالیات پر تنقیدی مکالمے بھی شامل ہوں۔

اسی ضمن میں ہماری ایک اہم کاوش یہ بھی ہے کہ اُن گمنام اور فراموش کردہ شعراء کو ادبی منظرنامے پر نمایاں کیا جائے، جو اگرچہ اس فانی دنیا سے رخصت ہو چکے ہیں، مگر اُن کے اشعار آج بھی دلوں میں تازگی اور حیات کی لہر بن کر دھڑکتے ہیں۔ ہم اُن کی شعری وراثت کو نئی نسل تک پہنچانے کے خواہاں ہیں۔ اسی طرح شعرخوان حضرات کا تعارف، اُن کی فنی مہارتیں، ساز و آواز کی نزاکتیں، اور موسیقائی روایت کے پہلو بھی اس مجلہ کا حصہ بنیں گے، تاکہ یہ نازک اور عظیم فن نہ صرف محفوظ ہو بلکہ نسلِ نو میں پروان بھی چڑھے۔

اس مجلے کی اشاعت میں متعدد احباب کا تعاون شامل رہا۔ خصوصاً ہمارے نائب مدیر محترم حافی صاحب کی مسلسل محنت اور بے لوث کوششیں قابلِ صد تحسین ہیں۔ اسی طرح میں اپنے دیرینہ دوست، ہمدمِ دیرینہ چوہدری محمد شہزاد کلیال (مقیم مسقط) کا بھی دلی شکریہ ادا کرتا ہوں جن کے خصوصی تعاون سے یہ ادبی چراغ فروزاں ہوا۔

                                                                                                                                                                 محترم شکور احسن صاحب کا بھی دلی شکریہ ادا کرنا اپنا فرض سمجھتا ہوں، جو پوٹھوہاری زبان و ادب کے ایک مخلص، سرگرم اور صاحبِ بصیرت علمبردار ہیں اور   متعدد پوٹھوہاری کتب کے مصنف، شاعر اور محقق بھی ہیں۔ دراصل انہی کی تحریک، حوصلہ افزائی اور دلی وابستگی کی بدولت یہ مجلہ منظرِ عام پر آ سکا۔ ان کی ادبی خدمات ہماری زبان و ثقافت کا اثاثہ ہیں۔

اس موقع پر میں جناب محمد سلیم مرزا صاحب کا بھی دلی شکر گزار ہوں جنہوں نے اس مجلے کے لیے نہ صرف اپنی قیمتی آرا سے ہمیں نوازا بلکہ اپنی گوناگوں مصروفیات کے باوجود اس مجلے کی سرپرستی قبول فرما کر ہماری حوصلہ افزائی فرمائی۔ اُن کی فکری رہنمائی اور مشفقانہ سرپرستی اس ادبی منصوبے کے لیے سرمایۂ افتخار ہے۔

دعا ہے کہ اللہ تعالیٰ ہمیں اخلاص، استقامت، اور قبولیت کی وہ دولت عطا فرمائے جو اس مشن کو مزید وسعت دے، اور یہ قافلہ یوں ہی رواں دواں رہے — علم و ادب کی شمعیں روشن کرتا، دلوں میں چراغ جلاتا، اور نسلِ نو کے لیے تہذیبی شعور کا پیغام بن کر زندہ رہے۔آمین یا رب العالمین

                                                                                       طالبِ دعا:

عقیل احمد قریشی

مدیرِ اعلیٰ — سہ ماہی مجلہ ”چو مصرع“
طوبی فاؤنڈیشن

شئیر کریں: